"Anıñ ülüen qabul itäm"

Tramp Soğud Ğaräbstanı jurnalistı Cämal Qaşıqçını isän dip uylamıy

"Anıñ ülüen qabul itäm"

AQŞ ilbaşı Donal’d Tramp Soğud Ğaräbstanı jurnalistı Cämal Qaşıqçını isän dip uylamıy. Bu xaqta ul “N’yu-york Tayms” gazetına birgän interv’yusında belderde. “Ägär bik zur moğciza bulmasa, anıñ ülüen qabul itäm. Barlıq küzläw oyışmalarınıñ mäğ’lümatları şunı kürsätä,”-dide Tramp. Ul Qaşıqçınıñ ülemenä kemneñ cawaplı buluın äytmäde. Monıñ öçen ul tikşerü näticälären kürergä kiräk buluyın söyläde.

“N’yu-york Tayms” xäbärendä äytelgänçä, Amerikanıñ küzläw oyışması Qaşıqçınıñ ülemendä Soğud Ğaräbstanı täxet prinśı Möxämmät bin Sälmannıñ qatnaşı bulu turındağı mäğ’lümätkä iyä. Ämma Tramp waqıyğağa açıqlıq kertü öçen mönäsäbätle illär belän bergäläp êşläwlären genä belderde.

Tramp Montana ştatındağı saylaw oçraşuları barışında da jurnalistlarnıñ Qaşıqçı belän bäyle sorawlarına cawap birde. “Sezneñçä Qaşıqçı üldeme?”-sorawına anıñ cawabı: “Miña bu hiçşiksez şulay kebek toyıla. Tetränderüçe.”-dide.  Cämal Qaşıqçınıñ yuqqa çığuı häm ülüenä Riyad idaräseneñ cawaplı buluı ixtimalın da telgä aldılar. Tramp: “Monıñ näticäse awır bulaçaq,”-dip farazladı.

Trampnın urınbasarı Mayk Pens ta Qaşıqçı waqıyğasına qarata fikeren belderde. “Ägär jurnalist cäzalanıp üterelä ikän, bu irekle matbuğatqa zur yanaw digän süz. Monıñ öçen cawap birelergä tiyeş,”-dide ul.  



Bäyläneşle xäbärlär