اردوغان باکی‌دا دانیشدی

"یوخاری قاراباغ پروبلئمینین حل ائدیلمه‌سی، ارمنیستان ایله ایلیشکیلریمیزین دوزلمه‌سینین اولمازسا اولماز شرطی‌دیر، بو بئله بیلینمه‌لی‌دیر"

اردوغان باکی‌دا دانیشدی

جمهورباشقانی رجب طیب اردوغان، دوست و قارداش اؤلکه آذربایجان‌دا.

اردوغان، آذربایجانین باشکندی باکی‌دا رسمی مراسیمله قارشیلاندی.

اردوغان داها سونرا آذربایجان پرزیدنتی ایلهام علی‌یئو ایله باش باشا گؤروشدو.

گؤروش‌ده آذربایجان ایله استراتژیک ایلیشکیلرین و امکداشلیغین داها دا ایرلیله‌دیلمه‌سی اوچون آتیلاجاق آددیملار مذاکیره اولوندو.

پرزیدنت اردوغان، باکی‌نین قورتولوشونون ۱۰۰.جو ایلی تؤره‌نین‌ده دانیشماسیندا،

"یوخاری قاراباغ پروبلئمینین حل ائدیلمه‌سی، ارمنیستان ایله ایلیشکیلریمیزین دوزلمه‌سینین اولمازسا اولماز شرطی‌دیر، بو بئله بیلینمه‌لی‌دیر" دئدی.

"بون‌دان یالنیز ۲۵ ایل قاباق خوجالی‌دا باش وئره‌نلرین، یوخاری قاراباغ‌دا قتله یئتیریله‌نلرین حسابینی وئرمه‌یه‌ن، قاتیللری قهرمان اعلان ائد‌نلرین بیزه وئره‌جکلری هئچ بیر تاریخ درسی یوخدور" ایفاده‌سینی ایشله‌دن اردوغان،

"قارداشیمیزین تورپاقلارینین یوزده ۲۰سینی ایشغال آلتین‌دا ساخلایانلارین، ۱ میلیون‌دان آرتیق قارداشیمیزی دوغما یوردونا قایتماغا قویمایانلارین بیزدن سرحدلریمیزی آچمامیزی گؤزله‌مه‌لری عبث‌دیر" دئدی.

اردوغان آذربایجانین مرحوم پرزیدنتی حیدر علی‌یئوین قبری ایله تورکیه و آذربایجان شهیدلرینی ده زیارت ائتدی.

باکی تورک شهیدلیگینه گئدن ایکی پرزیدنت، بوراداکی آنیدا چلنگ قویدو و آنید دفترینی ایمضالادی.

اردوغان، شرف دفترینه بونلاری یازدی:

"عزیز شهیدلریمیز، بوندان تام بیر عصر اول موبارک قانینیزلا یازدیغینیز بؤیوک غلبه و باکی‌نین قورتولوشونو بو گون بؤیوک بیر جوشغویلا ادراک ائدیریک. بیزلره امانت قویوب گئتدیینیز قارداشلیغیمیزی داها دا ایر‌لی آپارماق اوچون تورکیه و آذربایجان اولاراق وار گوجوموزله چالیشیریق. ۱۹۹۱.جی ایلده یئنی‌دن مستقیللیینی اعلان ائد‌ن آذربایجان اؤلکه‌میزین ده دستگی ایله بؤلگه‌نین ثابت‌لیک و گوون سمبولو اولاراق هر بیر ساحه‌ده بؤیوک اوغورلارا ایمضا آتیر. روحونوز شاد اولسون".

آذربایجان پرزیدنتی ایلهام علی‌یئو ایسه شرف دفترینه یازدیقلاریندا، ۱۰۰ ایل اول مستقیل‌لیک و آزادلیق مباریزه‌سین‌ده اؤلکه‌سینین کمگینه گله‌رک شهید اولان تورک عسگر و ظابطلرین خاطره‌سینین اؤزلری اوچون عزیز اولدوغونو وورغولادی.

آذربایجان دؤولتینین و خالقینین، ایستیقلال اوغرون‌دا جانینی فدا ائد‌ن تورکیه‌لی قارداشلارینین خیدمتلرینه بؤیوک اؤنم وئردیگینه دقت چکن علی‌یئو،

"بوگون بیر داها قارداش تورک شهیدلرینی سایغی ایله یاد ائدیر، هر بیرینه الله‌دان رحمت دیلییرم. اونلارین دفن اولوندوغو تورک شهیدلیگی، تورک عسگرینین شجاعتینی گؤسترمکله برابر تورکیه و آذربایجانین بیر میللت، ایکی دؤولتین سارسیلماز بیرلیگینی و ابدی قارداش‌لیغینی تجسم ائتدیریر" ایفاده‌لرینی ایشلتدی.



ایلگیلی‌لی خبرلر