türkiye metbuatlirida bügün 02.05.2014

bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:

türkiye metbuatlirida bügün 02.05.2014

türkiye awazi radiyosi xewiri: «‹ axsham› géziti», «marttiki rékurttin kéyin, éksportta aprél éyidimu % 11.5 éshish qolgha keltürüldi» serlewhilik xewiride, aprél éyida éksportning bulturqining oxshash mezgildikige sélishturghanda % 11.5 éship, 13 milyard 153 milyon dollargha yetkenlikini yazdi. gézit, türkiye éksportchilar mejlisining bashliqi mehmet büyükekshining, éksportta «nahayiti zor muweppeqiyetlerning qolgha keltürülüwatqanliqi» ni eskertip, bu yilning deslepki 4 éyidiki omumiy éksportning % 9.5 éshish bilen 53 milyard 428 milyon dollargha yetkenlikini eskertkenlikini oqurmenliri bilen ortaqlashti. gézitning xewiride, aprél éyida 2 milyard 97 milyon dollar bilen aptomobil sahesining birinchi, 1.5 milyard dollar bilen kiyim - kéchek sahesining ikkinchi, 1.4 milyard dollar bilen ximiyiwi buyumlar sahesining üchinchi bolghanliqi eskertildi.
«‹sitar› géziti», «türkiye ishsizliqqa qarshi küreshte musulman döletlerge ülge boldi» serlewhilik xewiride, yer shari xaraktérlik iqtisadiy kiriziske qarimay ishsizliqni uzundin buyan bir xanida tutuwatqan türkiyening, yashlarni ishqa orunlashturush pilanini ashurup orunlashta ülgilik döletke aylanghanliqini yazdi. gézit, türkiyening ishsizliqqa qarshi küresh mesiliside islam döletlirige ülge yaratqanliqini oqurmenliri bilen ortaqlashti. gézitning xewiride, türkiye ishqa orunlashturush orgini bilen islam döletliri istatistika, iqtisadiy, ijtimaiy ishlar tetqiqatliri we maarip merkizi birlikte uyushturghan yighinda, islam hemkarliq teshkilatigha eza 20 ge yéqin musulman döletlerning wekillirini kütüwalghanliqi qeyt qilindi. gézit, islam döletliri istatistika, iqtisadiy, ijtimaiy ishlar tetqiqatliri we maarip merkizining, ishsizliq nisbiti yüksek sewiyediki islam ellirige türkiye yolgha qoyuwatqan modéllarni tonushturghanliqini, ishqa orunlashturush we emgek küchi saheside ishqa ashuruwatqan telim - terbiye xizmetliri we tejribilirini ortaqlashqanliqini tekitlidi.
«‹ milliyet› géziti», «gérmaniyening tichibo shirkiti eng köp türk qehwesi satidu» serlewhilik xewiride, gérmaniyening tichibo shirkiti türkiye shöbisining bash diréktori shenay küchük tanshu bilen élip bérilghan ziyaret xatirisi toghruluq melumat berdi. gézit, tanshuning, yürüshleshken mehsulatlar sistémisi tizimlikige türk qehwesinimu kirgüzüsh üchün uda ikki yil japaliq izdengenliklirini tekitlep, «dunyaning lider qehwe ishlepchiqarghuchiliridin biri bolush süpitimiz bilen türk qehwesinimu sétishimiz lazimliqini tonup yettuq. shuning bilen tirishchanliq körsitip, pilanimizni shirkitimizning gérmaniyediki merkizige qobul qilghuzduq. nöwette qehwelirimiz arisida eng bazar tépiwatqini türk qehwesi» dégen sözlirini neqil keltürdi.
«‹yéngi shepeq› géziti», «tenterbiye xewerliri» sepisidiki «talantliq türk mahir» serlewhilik xewiride, ispaniye taratqulirining, 40 yil kéyin chémpiyonlar musabiqiside hel qilghuch musabiqige qatnashqan atlétiko madrid komandisining muweppeqiyiti toghruluq melumat berdi. gézit, ispaniye taratqulirining türk mahir arda turanni maxtap kötürgenlikini oqurmenliri bilen ortaqlashti. gézitning xewiride, «talantliq türk mahir» dep atalghan ardaning, tarix sehipisidin chémpiyonlar musabiqisi hel qilghuch musabiqiside waratagha top kirgüzgen tunji türk mahir süpitide orun alghanliqi tekitlendi.

 


خەتكۈچ:

مۇناسىۋەتلىك خەۋەرلەر