türkiye metbuatlirida bügün 10.05.2014

bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:

türkiye metbuatlirida bügün 10.05.2014

türkiye awazi radiyosi xewiri: «‹sabah› géziti», yawropa ittipaqi, türkiyening ittipaqqa ezaliq mesilisige istiratégiye nuqtisidin qarishi kérek» serlewhilik xewiride, bash ministir rejep tayyip erdoghanning, yawropa ittipaqining küchini téximu zoraytidighan, pirinsip - ölchemlirining téximu köp jughrapiyeler we ellerge keng tarqilishida türtkilik rol oynaydighan eng muhim munasiwetler torining türkiye bilen ishqa ashidighanliqini éytqanliqini yazdi. gézit, bash ministir erdoghanning, «yawropa ittipaqi türkiyening ezaliq mesilisige istiratégiye nuqtisidin we uzaq mezgillik menpeetliri dairiside qarishi lazim» dégen sözlirini neqil keltürdi. gézitning xewiride, bash ministir erdoghanning, «dölitimizning muzakire basquchining dinamikiliq we istiratégiyelik pilan boyiche dawamlashturulushining hem yawropa ittipaqi hemde türkiyening menpeetlirige paydiliq ikenlikini tekitleymiz, bu yilni dölitimizde ‹yawropa ittipaqi yili› dep qaraydighanliqimizni eskertimiz» dégenliki qeyt qilindi.
«‹hürriyet› géziti», süriyede insanperwerlik yardem eshyaliri toshuwatqan insan heq we hörriyetliri fondi jemiyitige teelluq ikki insaniy yardem yük mashinisining hujumgha uchrighanliqini yazdi. gézit, yük mashinilirining süriye amiyesi ayropilanlirining hujumigha uchrighanliqini oqurmenliri bilen ortaqlashti. gézitning xewirining dawamida, diplomatiye ministiri ehmet dawutoghluning tünügün enqerede bashlanghan süriye türkmen omumiy kéngesh yighinda mezkur weqege qattiq naraziliq bildürgenliki eskertildi. gézitning xewirige qarighanda, dawutoghlu, «hayatimiz siyasiy jehettinla emes, biyologyelik jehettin xewpke uchrisimu süriye xelqini hergizmu yalghuz tashlap qoymaymiz» dégen.
«‹ hürriyet› géziti», «11 ming esker qizil meydanda» serlewhilik xewiride, sabiq sowét ittipaqining natsistlar armiyesini yenggenlikining xatire küni bolghan zeper künining rusiyening paytexti moskwada daghdughiliq halda tebriklengenlikini yazdi. gézitning xewiride, köp sanda urush ghazilirimu ishtirak qilghan qizil meydandiki tebriklesh paaliyetlirige 11 minggha yéqin eskerning qatnashqanliqi qeyt qilindi.
«‹zaman› géziti», «qirimda ‹zeper› tebriklidi» serlewhilik xewiride, mart éyida qirimning rusiye teripidin ishghal qilinishidin kéyin rusiye pirézidénti wladimir putinning rayonda tunji qétim ziyarette bolghanliqini yazdi. gézitning xewiride, ruslarning zeper künide ishqa ashurulghan ziyaretning kiyéw teripidin eyiblengenliki eskertildi. gézit, shimaliy atlantik ehdi teshkilatining putinning ziyaritige qarita «uyghunsiz ziyaret» dep baha bergenlikini oqurmenliri bilen ortaqlashti.
«‹zaman› géziti», istanbul medeniyet - senet fondi jemiyiti teripidin uyushturulghan 19 - nöwetlik istanbul tiyatir féstiwalning tünügün kechte bashlanghanliqini yazdi. gézit, féstiwalning harbiye muhsin ertughrul zalida girizégoriz jarziynaning rézhissorluqidiki «beribir paydisi yoq» namliq oyun bilen bashlanghanliqini eskertti. gézitning xewiride, 5 - iyunghiche dawamlishidighan féstiwalda cheteldin 7, türkiyedin 33 tiyatir ömikining 100 ge yéqin nomur körsitidighanliqi qeyt qilindi.
«‹ hürriyet› géziti», bu yil 37 döletning ishtirak qilishida 59 - nöwetlik Eurovision naxsha - ussul musabiqisining ikkinchi yérim hel qilghuch musabiqisining ötküzülgenlikini yazdi. gézit, ikkinchi yérim hel qilghuch musabiqidin kéyin shiwétsariye, silowéniye, polsha, romnéye, norwégiye, girétsiye, malta, bélarusiye, finlandiye we awistriye qatarliq döletlerning wekillirining bügün kechte ötküzülidighan hel qilghuch musabiqige qatnishish salahiyitige érishkenlikini oqurmenliri bilen ortaqlashti. gézitning xewiride, yérim hel qilghuch musabiqide ghelibe qilghan qaradagh, wéngiriye, rusiye, erméniye, ezerbeyjan, san marino, ukraina, gollandiye, shiwétsiye we islandiye qatarliq 20 döletning hel qilghuch musabiqige qatnishish salahiyitige érishkenliki bildürüldi.


خەتكۈچ:

مۇناسىۋەتلىك خەۋەرلەر