türkiye metbuatlirida bügün 15.05.2014

bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:

türkiye metbuatlirida bügün 15.05.2014

türkiye awazi radiyosi xewiri: «‹yéngi shepeq› géziti», «matem» serlewhilik xewiride, türkiyening soma pajieside hayatidin ayrilghan ishchilar üchün qan yighlawatqanliqini yazdi. kömür kan weqeside hayatidin ayrilghan ishchilarning 77 milyon türkiye xelqining yürek baghrini qattiq ezgenlikini eskertken gézit, bash ministir rejep tayyip erdoghanning üch künlük «milliy matem» élan qilghanliqini oqurmenliri bilen ortaqlashti. gézitning xewiride, resmiy orunlar we türkiyening chetellerdiki wekaletxanilirida türkiye bayriqining yérim chüshürülgenliki qeyt qilindi. gézit, türkiye büyük millet mejliside 1 minutluq hörmette turulghanliqi, arqidin parlamént paaliyetlirining waqtinche toxtitip qoyulghanliqini yazdi. gézitning xewiride, barliq köngül échish pirogrammiliri bilen konsértlarning bikar qilinghanliqi, herqaysi jamelerde soma shéhitliri üchün mewlut oqutulghanliqi bildürüldi. pütkül dunyaning türkiyening qayghusini ortaqlashqanliqini eskertken gézit, amérika qoshma ishtatliri, rusiye, iran, bosna hersek, pakistan, gérmaniye we girétsiye qatarliq döletlerni öz ichige alghan köpligen eller bilen yawropa ittipaqining teziye bildürgenlikini oqurmenliri bilen ortaqlashti. gézitning xewiride, engiliyening bash elchixana binasidiki türkiye bayriqini yérim chüshürgenliki, israiliye bash elchixanisiningmu murasimini bikar qilghanliqi qeyt qilindi.
«‹sabah› géziti», «béshimizgha külpet chüshti» serlewhilik xewiride, jumhuriyet tarixining eng chong palaketliridin birining, 77 milyon türkiye xelqining yürek baghrini xun qilghanliqini yazdi. gézit, türkiyeni qattiq qayghugha tashlighan pajie tüpeyli döletning herqaysi jaylirida üch künlük matem élan qilinghanliqi, 19 - may atatürkni xatirilesh, yashlar we tenterbiye bayrimini tebriklesh paaliyetlirining resmiy murasimlar sirtida bikar qilinghanliqini oqurmenliri bilen ortaqlashti. köpligen döletlerning teziye télégrammisi yollighanliqini eskertken gézit, papaning ölüp ketken kömür kan ishchiliri üchün dua qilinishini telep qilghanliqini qeyt qildi. gézitning xewiride, amérikiliq naxsha cholpini rihannaning, Twitter da somada ölüp ketken ishchilargha teziye bildürgenliki, Liverpool bilen Chelsea komandiliriningmu türkiyening qayghusigha ortaqlashqanliqi bildürüldi. gézit, türkiye xelqining qayghusigha ortaqlishish üchün shimaliy qibris türk jumhuriyitide ikki künlük, pakistanda bir künlük matem élan qilghanliqini yazdi.
«‹sitar› géziti», «matemdimiz» serlewhilik xewiride, somada kömür kan weqesi yüz bergenlikini bildürdi. gézit, pajiedin kéyin jumhur reis abdullah gül bilen bash ministir rejep tayyip erdoghanning, dölet ishliri ziyaretlirini bikar qilghanliqi, öktichi partiyeler bilen ministirlarningmu pirogrammilirini kéchiktürüp, somagha barghanliqini oqurmenliri bilen ortaqlashti. gézitning xewiride, tünügünki tenterbiye musabiqiliri bilen köngül échish paaliyetliriningmu kéchiktürülgenliki qeyt qilindi.
«‹ milliyet› géziti», «pütkül dunya soma üchün köz yéshi tökmekte» serlewhilik xewiride, soma pajiesi tüpeyli nurghunlighan döletlerning rehberlirining teziye télégrammisi yollighanliqini yazdi. gézit, soma pajiesining peqet türkiyenila emes, pütkül dunyanimu qayghugha tashlighanliqini oqurmenliri bilen ortaqlashti. gézitning xewiride, bir qisim chetel taratqulirining weqeni waqti - waqtida xewer qilghanliqi, pajiening köpligen döletlerde künning eng muhim weqesi dep qaralghanliqi eskertildi.
«‹ weten› géziti», «ara turanning yürek baghri ézildi» serlewhilik xewiride, Atletico Madrid komandisi mahiri arda turanning, somada hayatidin ayrilghan ishchilarning xewirini anglap, özini tutuwalalmay höngrep yighlap ketkenlikini, kespdashlirining nahayiti teste teselli bergenlikini yazdi. gézit, Atletico komandisining tünügünki paaliyetliride nahayiti qiynalghan ardagha kespdashlirining teselli bergenlikini oqurmenliri bilen ortaqlashti.


خەتكۈچ:

مۇناسىۋەتلىك خەۋەرلەر