EXPO-2016 – antalya körgezmisi resmiy échildi

«EXPO-2016 – antalya körgezmisi» tünügün «chéchek we balilar» témisi astida ötküzülgen murasim arqiliq échildi.

expo açıldı.jpg

türkiye awazi radiyosi xewiri: échilish murasimigha jumhur reis rejep tayyip erdoghan, bash ministir ehmed dawutoghlu, türkiye büyük millet mejlisi bashliqi ismail qahraman, köp sanda ministir, bir qisim chet ellik diplomatlar, ijtimaiy küchler bashqurushidiki organlarning wekilliri, parlamént ezaliri we méhmanlar bolup 5 mingdin artuq adem ishtirak qildi.

jumhur reis erdoghan murasimda söz qilip, bu qurulushqa bashtin tartipla bir milliy qurulush, dep qarap kelgenliklirini eskertti we «biz échiwatqan ‹EXPO-2016 körgezmisi› peqet antalyaningla emes, pütkül türkiyening ortaq iradisining, dölet we xususiy sahelerning hemkarliqining mehsulidur» dédi.

‹EXPO-2016 körgezmisi› ning türkiyege élip kélidighan paydisi toghrisida toxtalghan erdoghan, ‹EXPO-2016 – antalya körgezmisi› boyiche türkiyening ösümlük bayliqini dunyagha tonushturushtin sirt élip bérilidighan ilmiy xizmetler we yighinlar arqiliq döletlerni bu dairide ortaq munber etrapigha toplashni nishan qilghanliqlirini éytti. u, «biz ‹EXPO-2016 – antalya körgezmisi›ni menggülük qilidighan bir asasni salduq. buningdin kéyin bu yer sayahet we medeniyetning eng muhim merkezlirining birige aylinidu» dégenlerni sözlirige ilawe qildi.

bash ministir ehmed dawutoghlumu körgezmining dunyaning muhit bulghinish mesililirige chare tépish nuqtisidin muhim ikenlikini qeyt qildi.

‹EXPO-2016 – antalya körgezmisi› ning muhit mesilisini otturigha qoyidighan bir üstel bolidighanliqini bildürgen dawutoghlu, dunyaning muhit mesililiri we ewladlirimizgha teyyarlighan kélechekke dair nahayiti muhim témilarning otturigha qoyulidighanliqini eskertti.

échilish nutuqliri sözlinip bolghandin kéyin jumhur reis erdoghan sahediki türk baghchisining échilish lintisini kesti. 

olimpik musabiqiliri we dunya longqisidin qalsa eng chong paaliyet hésablinidighan dunya ösümlük körgezmisi 160 yilliq körgezme tarixida tunji qétim türkiyede échildi. jumhur reislik sariyining himayisi astidiki ‹EXPO-2016 – antalya körgezmisi› antalyaning aqsu nahiyesi tewelikidiki 121 moluq körgezme saheside 191 kün boyiche ochuq bolidu.

témisi «chéchek we balilar», shoari «kelgüsi ewladlar üchün yéshil bir dunya» bolghan ‹EXPO-2016 – antalya körgezmisi› arqiliq türkiye tarixi, medeniy mirasi, ösümlük bayliqi, yéza – égiliki we iqtisadiy imkaniyetlirini dunyagha tonushturush pursitige ige bolidu.

körgezme dairiside 6 ay boyiche türkiye we xelqara sewiyede konsérlar qoyulidu, qurultay we ilmiy muhakime yighinliri échilidu, milliy we mexsus künler bilen birlikte ramizan éyi paaliyetliri, kocha nomurliri dégendek pirogrammilar orunlashturulidu.

52 döletning baghchisi we yüzlerche ösümlük türi körgezme qilinidighan‹EXPO-2016 – antalya körgezmisi›dairiside 8 milyon kishining antalyada ziyarette bolushi kütülmekte.



مۇناسىۋەتلىك خەۋەرلەر